「Alfafa Cafe」 @橫頭磡 樂富廣場 (2023.08.18-Evening) 好耐無光顧，放工後又頗肚餓，就入去 Alfafa, 再以 QR Code 點咗店舖 招牌食品「Alfafa 沙律」 & 「Alfafa 海鮮飯」。等咗超過 45分鐘， 主食焗飯上枱，賣相還可以，但鐵製碟仔全不燙手，飯好油淋淋。上面放上 4隻相信係外國入口嘅青口、一隻大蝦及一塊細火柴盒般大小嘅魚肉。用不鏽鋼匙羮畢來食，飯相當油且有好多白飯，翻勻紅色夾雜白色不熱嘅飯，裏面只有一塊外直徑與一元硬幣相若嘅魷魚圈及 4隻小蜆 同一些紅、綠色辣椒、洋葱絲同番茄塊。因為飯實在太油且冷，只食咗 三份一左右已無哂食慾喇。 於是舉手召來一位生面口但看上體格強健嘅 Waitress 問她「點解今日隻鐵碟唔熱嘅？啲飯仲好油又好多白飯喎？哩個飯應該咪係廚師哥哥做㗎啦！？」 『哦！係噉呀！』她即時收咗份「海鮮飯」, 轉身邊行邊留下冷漠一句『我話俾佢知。』 我見她將啲「海鮮飯」都全倒入廚餘桶，隨着匿站在一旁看手機，不曾將我嘅話轉告訴廚房及新男經理。我唯有飲完杯 玫瑰咖啡，再舉手。 此時另一位 Waitress 行過來問我是否要甜品，我回答她「唔喇，今日份飯做得好差，碟唔熱、飯又炒唔勻又好油淋淋，我食唔落所以唔飽，趁依家未到 9點，快啲找數去第二處買嘢食好過喇。」 『係咩！妳唔話俾我地知？』舊 Waitress 語氣頗真誠地問。 「約 20分鐘前話咗俾妳位新女同事知，她只收咗份飯倒哂就算喇。」我回答。 舊 Waitress 急忙過去告訴新經理。經理轉頭望咗我一眼，就叫 舊 Waitress 拿賬單給我。今日嘅光顧，令我深切體會到今日嘅 Alfafa ，可能係經理 Henry 調走咗嘅關係，啲服務真係令人非常失望。

(2023.05.13-AM) 今日係母親節前夕, 上午 1020時 到達 Alfafa 攞咗枱, 等候約咗嘅媽媽與姪兒到 Alfafa 食晏。現場不見經理, 只有常見嘅 「染金色長髮戴金絲眼鏡」女職員、1位 「扎長馬尾辮子矮小」女職員、1位「身形略胖短髮有頗濃鄉音」女兼職員工及 2位兼職年輕男員工。我先 order 咗 All Day Breakfast, 等到媽與姪兒來到, 「頗濃鄉音短髮」女兼職員工在隔兩張枱午膳, 我哋用餐廳規定嘅手提電話程式落咗 order, 之後分別舉手欲向職員落 「減冰 或 少糖」飲品 order, 該位 「染金色長髮戴金絲眼鏡」 女職員 及 「扎長尾辮子矮小」女職員 全程縮在收銀機附近傾偈, 若見到顧客 舉手, 即拎轉面向牆扮作睇唔到。我哋連同全場顧客只能搵到 2位「走足全場」嘅年青男兼職員工幫手, 足以證明原來 2位上述各具特色嘅長髮女職員都係「紙板人」。 直到 12時許,「頗濃鄉音短髮」女兼職員幫手招呼顧客, 加上 1名剛返工男職員進駐水吧, 2名 「紙板人」仍然維持原狀。 因為媽媽杯熱 Latte 無落糖, 我見各位員工 (除咗 2「紙板人」都極忙, 我親自行去收銀機旁向 2「紙板人」要求攞「咖啡黃糖」, 「染金髮戴金絲眼鏡」女職員在她 龜縮處「基地」取出一條紙包糖隨手遞向我。我帶回坐位交俾媽媽, 她扭斷紙包倒糖落杯先發現原來係「白沙糖」! 到結賬時候舉手超過約 20分鐘到手都軟 都未得回應, 我媽在旁說『嗰個專登拎轉面四眼妹成日都咁高竇㗎。我哋啲上咗年紀嘅主婦佢完全扮睇我哋唔到㗎啦! 所以我哋都唔敢嚟食下午茶囉!』 卒之「頗濃鄉音短髮」女兼職員工開來招呼我。結賬 HK$620+, 我隨即付她 HK$1,000 增值 VIP Card 及找數。當她將 VIP Card invoice 交給我時, 我向她問「我哋張單未夠數攞到 母親節禮物 Donut 咩?」 『唔知啊!』她回答後轉身大步離開。 我手持單據及增值票據, 直接行去收銀機位置搵「染金髮戴金絲眼鏡」女職員問她「小姐, 請問聲母親節禮物 Donut 係咪已經派完呀?」 「染金髮戴金絲眼鏡」女職員立即差不多 3小時來首次自行離開她「基地」到水吧前喝令 水吧男職員『一盒呀!』 工作中嘅 水吧男職員一臉「???」 『Donut 呀!』她又黑哂面低聲說。 之後她直接由 水吧男職員處接過一盒由雪櫃出來嘅 盒裝 Donut 交俾我, 之後又直綫返回她「基地」。 真無法理解 星期六, 仲要係母親節前夕, 何解區內堂堂最大規模嘅餐廳, 只安排 3位兼職員去提供服務, 顧客不單要自行搵位, 還要等執枱, 更要全程遭受全職職員所提供嘅「根合不合乎最基本侍客之道」嘅無視與冷對待!

(2021.11.16-PM) 今日經理放假, 員工工作散漫, 竟安排我坐一張餐枱有油汚及已乾汁醬嘅餐枱, 櫈有麵包皮碎, 店內連我哋在內只有四張枱有客, 仍需自行清理。最離譜係焗飯及其他主食差不多食完餐飲尚未到, 枱上清水飲完, 唯有舉手搵妹妹店員幫手啦, 妹妹竟然幫我地拿來賬單喎, 我跟她說「我地嘅餐飲未到同未 order 甜品, 樽內水飲曬, 唔該跟進下, 好口喝呀。」 轉頭妹妹拿來一樽水又再問我哋要甚麼餐飲, 我地先知道原來她們先前並無幫我地落 order, 唯有再重複購多次餐飲同落埋甜品 order 啦。結果哩個晚餐聚會需時差不多4小時。

(2021.08.23-PM) 店內提供相信有問題樽裝飲用水

• 晚餐期間發現（以肉眼都可看見）玻璃樽內有大量纖毛同白色粒狀碎屑在樽內食水中浮沉，召來店員要求換另一樽水及杯，即被轉介「染金髮戴金絲眼鏡」女代理店長跟進。女代理店長告訴我地『剛換咗水機濾心，食水出現哩啲嘢，甚至泡泡都好正常，可以放心飲用，唔使擔心，......所以無須更換。』 相信她可沒有發覺自己有加入政府做發言人嘅潛質。

(2020.12.21) 因為限聚令，下午 1540時，與丈夫提早去食下午茶兼做節，我單身在門外探熱表示兩位，女代理店長帶我去2人坐位，但見枱上有一塊枱墊、一樽水、一隻水杯、一塊紙巾、一隻湯匙與一把餐刀，我隨口跟女代理店長說：「唔該加多一位同俾份 menu 我吖。」 十多分鐘後，我丈夫到餐廳坐下問我『點解唔先叫嘢食呀？』 「攞枱時問咗女店長要 menu，但佢都無俾我。」我無奈回答。於是我倆齊舉手找店員拹助 ，記得當時除女店長外尚有 3位 waiter 或 waitresses 在工作。 一陣過後女代理店長發現尋求拹助嘅我倆，走過來問我倆『今日要啲乜嘢？』 我丈夫笑對她說『未有 menu呀。同埋唔該加多份餐具俾我吖。』 女代理店長馬上由鄰枱拿來 menu 給我丈夫並說『Last order 4點 3，你落 order 先幫你加位啦！』 我倆聽聞後頗 surprise，我丈夫唯有說『等我地諗諗先吖。』女代理店長馬上快步離開，手持手機離開店舖。 『算啦，過時過節要開工，係咁㗎喇。』我唯有這樣講安慰自己，然後找其他店員拹助落晚餐 order。

(2017) Nice food in Lok Fu, but always provide below standard service of the waiters & waitresses, due to under manning.,