ചരിത്ര പ്രസിദ്ധമായ തൃക്കുരട്ടി മഹാദേവ ക്ഷേത്രത്തിലെ പടിഞ്ഞാറെ നട.✨✨🪷🪷 ഈ വർഷം പടിഞ്ഞാറെ നടത്തുറപ്പ് ശിവരാത്രി ദിനം പിറ്റേന്ന് (19 ഫെബ്രുവരി 2023) പുലർച്ചെ 4 മണിക്ക്. 🌸വർഷത്തിലൊരിക്കൽ മാത്രം തുറക്കുന്ന പടിഞ്ഞാറേ നട

നൃത്തത്തിനെഴുന്നള്ളിക്കുമ്പോൾ ബിംബം നൃത്തച്ചട്ടത്തിൽ വച്ച് കീഴ്ശാന്തി തലയിൽ വെയ്ക്കുന്നു. കീഴ്ശാന്തി ഏഴുപ്രദക്ഷിണം വയ്ക്കും. ശ്രീഭൂതബലിയ്ക്കിറങ്ങുമ്പോൾ തന്നെയാണ് നൃത്തം എഴുന്നള്ളത്തും, അഞ്ചാം പ്രദക്ഷിണം പടിഞ്ഞാറെ നടയിലെത്തുമ്പോൾ മാത്രമാണ് ദർശനത്തിനായി ഈ നട തുറക്കുന്നത്. ശ്രീകോവിൽ മുതൽ പടിഞ്ഞാറെ നട വരെ നിലവിളക്കുകൾ കൊളുത്തി വച്ചിരിക്കും. ഭക്തന്മാരുടെ നാമസങ്കീർത്തനം ഉയരുമ്പോൾ കീഴ്ശാന്തി നൃത്തച്ചട്ടത്തോടു കൂടി ക്ഷേത്രത്തിനകത്തേക്കു ദർശനം നടത്തി അനുഗ്രഹത്തോടു കൂടി പുറകോട്ടു മാറുന്നു. ഹര ഹര മഹാദേവ എന്ന അഷ്ടാക്ഷരമന്ത്രവും ഹര ഹരോ ഹരി എന്ന ഷഡാക്ഷര മന്ത്രവും ആകാശത്തെ ഭേദിക്കുമാറ് ഭക്തജനങ്ങളിൽ നിന്നും ഉയരുന്നു. കീഴ്ശാന്തി മുന്നോട്ട് കുതിച്ച് വീണ്ടും ക്ഷേത്രത്തിനുള്ളിലേക്കു ദർശനം നടത്തുകയും തുള്ളി പുറകോട്ടു മാറുകയും, വടക്കോട്ടുള്ള തളക്കല്ലിൽ കൊളുത്തിയിരിക്കുന്ന കർപ്പൂര ദീപാവലിയിൽക്കൂടി കിഴക്കേ നടയിലേക്കോടുകയും ചെയ്യുന്നു. ഭക്തജനങ്ങൾ മന്ത്രോച്ചാരണങ്ങളുമായി കീഴ്ശാന്തിയെ അനുഗമിക്കുന്നു. അനുഗ്രഹം കൊണ്ടതിനു അല്പശമനം വന്നതിനു ശേഷം തൃക്കൈ കാണിക്ക സ്വീകരിക്കുന്നു. അങ്ങനെ രണ്ടു പ്രദ ക്ഷിണം കൂടി കഴിഞ്ഞ് (ഏഴാമത്തെ പ്രദക്ഷിണം പൂർത്തിയായിരിക്കും) കിഴക്കേ നടയിലെത്തി തൃക്കൈ കാണിക്ക സ്വീകരിക്കുന്നു. ഒടുവിലത്തെ തൃക്കൈ കാണിക്ക നാദസ്വര വിദ്വാന്റെ മടിയിൽ ഇടുന്നു. 🌸തൃക്കുരട്ടി ക്ഷേത്രമാഹത്മ്യം🌸

കൃതയുഗത്തിൽ ഒറ്റ ദിവസം കൊണ്ട് ചതുർദശ ലോകങ്ങളും ആക്രമിച്ച് കീഴടക്കിയ മാന്ധാതാ ചക്രവർത്തിയുടെ നൂറുയോഗങ്ങളിൽ ഒന്ന് മാന്നാറിലായിരുന്നു. ഈ പുണ്യഭൂമി അഗസ്ത്യമുനി, ക്രോഷ്ടു മഹർഷി തുടങ്ങിയ യതി വര്യന്മാരുടെ പാദസ്പർശം കൊണ്ട് പാവനമാണ്. ക്രോഷ്ടു മുനി ചേരിക്കെട്ടി താമസിച്ച സ്ഥലം കൊരട്ടിച്ചേരി (കുരട്ടിശ്ശേരി) ആയി. കുരട്ടിശ്ശേരിയുടെ കിഴക്കുഭാഗത്തുള്ള കുരട്ടിക്കാട് എന്ന ഉഗവനപ്രദേശത്തു വച്ച് മാന്ധാതാവ് യാഗം ആരംഭിച്ചു. യാഗാവസാനം ബ്രഹ്മാണ്ഡ നായകനായ ശ്രീ പരമേശ്വരൻ പ്രത്യക്ഷപ്പെട്ട് ഈ യജ്ഞഭൂമിയിൽ തന്നെ പ്രതിഷ്ഠിക്കണ മെന്ന് അരുളിച്ചെയ്തിട്ട് മറഞ്ഞു. മാന്ധാതാവിന് ദർശനം ലഭിച്ച സ്ഥലം ആദ്യം മാന്ധാതാപുരവും പിന്നെ മാന്നാറുമായി.

സംഹാരമൂർത്തിയായ രുദ്രൻ സതീദഹനശേഷം തപസിരിക്കുന്നതായി സങ്കൽപ്പിച്ചിട്ടുള്ള ശിവലിംഗം കൈലാസത്തു നിന്നും കൊണ്ടുവന്നാണ് കുരട്ടിയിൽ പ്രതിഷ്ഠിച്ചത്. ഭഗവാൻ മാന്ധാതാവിന് ദർശനം കൊടുത്ത് ദിനമാണ് മിഥുന മാസത്തിലെ പുണർതം ആ നാളിൽ മെയ്ക്കാട്ടിപൂജ ക്ഷേത്രത്തിൽ ഇന്നും നട ത്തുന്നു. ക്ഷേത്രമതിൽക്കെട്ട് ഒറ്റരാത്രി കൊണ്ട് ഭൂതഗണങ്ങൾ ഉണ്ടാക്കിയെന്നാണ് ഐതീഹ്യം.

ശ്രീകോവിലിൽ തന്നെ തെക്കു ഭാഗത്തായി ദക്ഷിണാ മൂർത്തിയേയും, ഗണപതിയേയും പ്രതിഷ്ഠിച്ചിരിക്കുന്നത് ഭഗവാന്റെ രൗദ്രത കുറയ്ക്കുന്നതിനാണ്. ഇതേ ഉദ്ദേശത്തിലാണ് ക്ഷേത്രത്തിന് കിഴക്കുമാറി തൻമടിക്കുളത്തിന്റെ കരയിൽ പടിഞ്ഞാട്ടു ദർശനമായി ഇണ്ടളയപ്പൻ (എൺതലയപ്പൻ) അഥവാ ധർമ്മശാസ്താവിനെ പ്രതിഷ്ഠിച്ചിരിക്കുന്നത്.