Dahi Azərbaycan bəstəkarı, dirijor, musiqişünas, publisist, dramaturq, pedaqoq, ictimai xadim, SSRİ xalq artisti, II dərəcəli iki "Stalin" mükafatı laureatı, "Lenin" ordeni kavaleri, Azərbaycan SSR Konservatoriyasının rektoru, Azərbaycan SSR Bəstəkarlar İttifaqının sədri, SSR Ali Sovetinin deputatı, Azərbaycan SSR himninin və Azərbaycan himninin müəllifi Üzeyir bəy Əbdülhüseyn bəy oğlu Hacıbəyov 18 sentyabr 1885-ci ildə Ağcabədidə anadan olmuşdur. Əslən Şuşa qəzasından olan bu görkəmli şəxsiyyət Azərbaycan müasir peşəkar musiqi sənətinin banisidir. Üzeyir Hacıbəyov bütöv İslam dünyasında ilk operanın müəllifidir. O, öz yaradıcılığında Qərb və Şərq musiqi üslublarını birləşdirmişdir. Bəstəkar, Azərbaycan xalq musiqisinin elementlərini klassik Avropa ənənələrinə uyğunlaşdırmışdır. Üzeyir Hacıbəyov Azərbaycanda və xaricdə bir çox tanınmış bəstəkar və musiqiçilərin pedaqoqu və müəllimi olmuşdur. Səid Rüstəmov, Asəf Zeynallı, Əfrasiyab Bədəlbəyli, Şəmsi Bədəlbəyli, Niyazi, Cövdət Hacıyev, Tofiq Quliyev, Qara Qarayev, Fikrət Əmirov, Cahangir Cahangirov, Şəfiqə Axundova və b. maestronun tələbələrindən idilər. Üzeyir Hacıbəyovun ev muzeyi 1975-ci il, noyabrın 20-də Ümummilli lider Heydər Əliyevin göstərişi ilə açılmışdır. Muzeydə dahi bəstəkarın əsərləri, şəxsi əşyaları, himnimizi ifa etdiyi pianosu və başqa eksponatlarla tanış olmaq mümkündür. Burada diqqəti çəkən xüsusi bir nüans da var. Bəstəkarın evindəki saatı onun vəfat etdiyi gecədəki həmin o zamanı göstərir. Bu sanki burada zamanın da onunla birgə dayandığını ifadə edir. Mən muzeyin əməkdaşı, öz savadı, biliyi ilə məni özünə valeh edən Gülarə xanıma xüsusi təşəkkürümü bildirmək istəyirəm. Yorulmadan, səbrlə, dəyərli məlumatları bölüşdüyünə görə ona minnətdaram. Onunla söhbət zamanı sanki o dövrlərə səyahət edir, Üzeyir Hacıbəyovla birgə bu divarların arasında addımlayır, pianodakı ifalarını bu dəfə ruhunuzla dinləyirsiniz. Əgər Azərbaycan musiqi sənəti və mədəniyyəti ilə tanış olmaq istəyirsinizsə, o zaman baş çəkəcəyiniz ilk məkan məhz Üzeyir Hacıbəyovun Ev Muzeyi olmalıdır.